قصيدة زجلية : حول عون سلطة المقدم MBK
عون السلطة
اليوم ف الصباح مشيت نشرب قهوة نرتاح
شريت جريدة الصباح
وقف حدايا المقدم جلس وسلم
مقلق باغي يبخ الدم
قال الله ينعل اللي مايحشم
بان ليكم غير لمقدم
بنادم حاسبني بركاك زور وظلم
هادي مهنة شريفة يا بنادم
انا عيون السلطة حارس لبلاد
من التخريب والجرم
شحال من مجرم شدوه ب سباب لمقدم
حب الوطن يسري ف الدم
نتكلم ب الجهر نقول انا مقدم
ديما معايا التلفون اللي شفتها نعلم
ف المظاهرات ذيما حاضر الورقة ولقلم
نكتب تقرير شكون سب شكون تكلم
سهران على الامن والسلم
الارهاب غدار ما يرحم
قلت ليه كلامك صح يا سي لمقدم
شاف في ضحك وتبسم
كتب علي قصيدة راك زجال معلم
نصفني خلي الناس تفهم
ياك انا ولد الحومة كبرت معكم
رجل مؤدب ف اعراض الناس مانتكلم
ف امن الدولة والله مانرحم
اللي سمعتها وشفتها نقولها علاش نحشم
ل كلام الناس ما نستسلم
هدا هو دور لمقدم..........
انت ف المجتمع عزيز مكرم يا خويا لمقدم
كلامك معقول ب العشرة عليه نبصم
ياك ف المهنة ضميرك مرتاح خلي الناس تكلم
اللي غلط ف حقك سامحيه اللسان مافيه عضم
انت مول لعقل ياسي لمقدم
ضحكت شفت فيه بغيت نخفف عليه
انا على حسابي براد ب اللويزة باش تبرد الدم
لمقدم رشقت ليه ابنادم الله يهديه
هو راكد يشخر ونا سهران عليه
ف حسن السيرة شهادة السكنى نشهد عليه
ف لوراق نسربيه
حاضي الدرب ولحومة من الصداع ولخوصمة
ف الانتخابات نسجل الخروقات
نتبع الحملة من بدات فين مشات
نعرف مقر كل حزب نكتب عنوان الدرب
الحاصول مهنة لمقدم صعيبة اللي كذب يجرب
ديما مع المواطن ف الحرب
واحد باغي شهادة ب الكذب
واحد باغي علي ينصب
شحال من واحد باغي يتقولب
مزوج باغي الشهادة عازب
المهم خوك لمقدم مسلح ب العلم
نتاكد مزيان عاد نبصم
القانون صعيب مايرحم............
